பிரம்படி பட்ட பரமன்
வைகை நதியின் வெள்ளப் பெருக்கு
மதுரை நகரை அலைக்கழிக்க அணை
கரை உடைத்து சுவர்கள் சாய்ந்தால்
அமைச்சரை அழைத்து வீட்டுக்கு ஒருவர்
அவசியம் வரணும் என்றே ஆணையிட
கரை அடைக்க கடுகியே வந்தனர்
கடமையைச் செய்ய கூட்டாக மக்கள்
வாரிசு இல்லா வயதான வந்திக்கிழவி
வந்துதவி செய்ய முடியாமல் வேதனையுற
மண்வெட்டியுடன் மதுரைச் சிவனே வந்து
மண்சுமந்தால் பிட்டெனக்கு தருவாயா கேட்க
கூலியாக பிட்டைக் கொடுத்தாள் வந்தி
கூத்தாடிச் சிவனோ களிப்புடன் உண்டான்
உண்ட மயக்கத்தால் உறக்கம் தழுவ
கண்களை மூடிக் களைப்பில் தூங்கினான்
அரைகுறை வேலை செய்து பயமின்றி
நிறைவுடன் தூங்கும் நிம்மதி இளைஞனை
கண்ட வேந்தன் கொண்டான் சினமே
கம்பை எடுத்து காட்டமாய் அடித்தான்
என்னே விந்தை எல்லோர் முதுகிலும்
மன்னனின் பிரம்படி மின்னலாய் ஓட
மன்னனின் முதுகிலும் மார்க்கமாய் தாக்கம்
மனம் விதிர்த்து மலைத்தவன் விழிக்க
மறைந்தான் மறையவன் மண்ணை விட்டு
பறைசாற்றி நின்ற பரம்பொருள் பரமன்
கூலியாளாய் வந்தது கூத்தனே என்றுணர்ந்து
நீலனை பணிந்து நிறைவாய் வணங்கினான்
சரஸ்வதிராசேந்திரன்
கருத்துகள் இல்லை:
கருத்துரையிடுக